Um vottorð
Afgreiðslutími
Afgreiðslutími vottorða er allt að 2 virkir dagar eftir að pöntun er móttekin, pöntunardagur er ekki talinn með. Helgar og frídagar teljast ekki til virkra daga. Ef póstleggja á vottorð þá bætist sendingartími Póstsins við afgreiðslutímann.
Pöntun
Einstaklingur getur eingöngu pantað vottorð fyrir sjálfan sig, skráðan maka og börn sín undir lögaldri auk annarra aðila sem viðkomandi hefur forsjá yfir. Foreldrar geta þó alltaf pantað fæðingarvottorð barna sinna. Sé vottorð pantað fyrir hönd annars einstaklings verður það sent í pósthólf viðkomandi eða sent á lögheimili eftir atvikum. Vottorð eru einungis gefin út á íslensku eða ensku.
Afhending
Rafræn vottorð eru send í pósthólf vottorðshafa á Ísland.is.
Allajafna eru rafræn vottorð aðgengileg í pósthólfi vottorðshafans sjálfs á Ísland.is Þegar um er að ræða vottorð með fleiri en einum vottorðshafa, t.d. fæðingar-, forsjár- og hjónavígsluvottorð, er vottorðið þó sent í pósthólf þess vottorðshafa sem pantar vottorðið. Vottorð fyrir börn eru send í pósthólf þess forsjáraðila sem pantar vottorðið. Dánarvottorð eru send í pósthólf þess aðila sem pantar vottorðið.
Þurfi fólk á pappírsvottorði að halda er hægt að fá þau send á lögheimili og er þá vottorðið sent á lögheimili vottorðshafa. Einnig er hægt að koma og sækja vottorð í afgreiðslu Þjóðskrár Íslands í Reykjavík. Ef vottorð er sótt þarf að framvísa löggiltu skilríki til að fá vottorð afhent.
Ef annar aðili en sá sem vottorð er fyrir sækir vottorð, þarf viðkomandi að framvísa umboði ásamt löggildum skilríkjum.
Athugið að athugasemdir vegna vottorða þurfa að berast innan þriggja mánaða frá útgáfudegi vottorðsins.
Apostille
Þurfi einstaklingar Apostille vottun á vottorð sín er hægt að óska eftir því að vottorðið verði sent til Sýslumannsins á höfuðborgarsvæðinu, sem sér um slíkar vottanir. Þjóðskrá sendir þá vottorðið beint til sýslumanns. Eftir það þurfa einstaklingar sem hafa íslenska kennitölu að panta og greiða fyrir Apostille þjónustuna á https://island.is/apostille. Í öðru falli er hægt að fylla út eyðublað eða senda beiðni á apostille@mfa.is
Skýringar vegna vottorða
Í tilfellum þar sem þörf er að útskýra atriði sem koma fram á vottorðum sem eru útgefin af Þjóðskrá Íslands t.d. nafnritun, hjúskaparstöðu, kennitölur o.s.frv. getur gagnast að prenta út eftirfarandi skjal