Kjörskrá og kosningaréttur
Hlutverk Þjóðskrár vegna kosninga
Samkvæmt lögum um Þjóðskrá Íslands nr. 70/2018 sér Þjóðskrá um gerð kjörskrár, rekstur utankjörfundarkerfis og önnur verkefni sem henni eru falin við undirbúning og framkvæmd kosninga.
Kosningalög nr. 112/2021
Þjóðskrá annast meðal annars gerð og útgáfu kjörskrár fyrir:
- forsetakosningar,
- Alþingiskosningar,
- sveitarstjórnarkosningar,
- þjóðaratkvæðagreiðslur,
Önnur verkefni:
- meðferð umsókna íslenskra ríkisborgara sem hafa verið búsettir erlendis lengur en 16 ár um að vera teknir á kjörskrá,
- meðferð umsókna námsmanna á Norðurlöndum um skráningu á kjörskrá í sveitarstjórnarkosningum,
- gerð og rekstur rafrænnar kjörskrár,
- þróun og rekstur upplýsingakerfa sem notuð eru við undirbúning og framkvæmd kosninga.
- Þjóðskrá annast gerð og útgáfu kjörskrár vegna íbúakosninga sveitarfélaga.
Um kjörskrá
Kjörskrá byggir á upplýsingum úr þjóðskrá um lögheimili kjósenda á þeim viðmiðunardegi sem kosningalög mæla fyrir um. Kjósandi er almennt skráður á kjörskrá í því sveitarfélagi þar sem hann á lögheimili 38 dögum fyrir kjördag.
Sveitarfélög fá aðgang að kjörskrá eigi síðar en 36 dögum fyrir kjördag. Á sama tíma opnar uppflettingarþjónustan „Hvar á ég að kjósa?“ á vef Þjóðskrár. Þar geta kjósendur kannað hvort þeir eru á kjörskrá og hvar þeir kjósa. Þegar kennitala er slegin inn birtast upplýsingar um nafn, lögheimili, sveitarfélag, kjörstað og kjördeild.
Heimilt er að senda Þjóðskrá athugasemdir ef talið er að einstakling vanti á kjörskrá eða sé þar skráður án þess að eiga rétt til þess. Slíkar athugasemdir má senda fram á kjördag á netfangið kosningar@skra.is.