Íbúum Reykjavíkurborgar fjölgaði um 1.654 íbúa á tímabilinu frá 1. desember 2023 til 1. júní 2024 og íbúum Kópavogsbæjar fjölgaði á sama tímabili um 445 íbúa. Íbúum Akureyrarbæjar fjölgaði á tímabilinu um 76 íbúa, í Reykjanesbæ hefur fjölgað um 307 íbúa og í Sveitarfélaginu Árborg fjölgaði um 188 íbúa.
Fjölgar hlutfallslega mest í Skorradalshreppi
Þegar horft er til hlutfallslegrar breytingar á íbúafjölda þá hefur íbúum Skorradalshrepps fjölgað hlutfallslega mest frá 1. desember 2023 um 18,6% en íbúum þar fjölgaði um 11 íbúa. Hlutfallslega fjölgaði íbúum næst mest í Kaldraneshreppi eða 5,6% en þar fjölgaði íbúum um 6 einstaklinga frá 1. desember 2023. Af 64 núverandi sveitarfélögum þá fækkaði íbúum í 14 sveitarfélögum en fjölgaði eða stóð í stað í 50 sveitarfélögum.
Landshlutar
Íbúum Suðurlands fjölgar mest, eða um 1,7% svo íbúum Vesturlands, eða um 1,6%.
Grindavík
Íbúum Grindavíkurbæjar fækkar um 508 á tímabilinu eða um 13,7%.
Hér er skrá yfir fjölda íbúa eftir sveitarfélögum í byrjun mánaðarins og samanburð við íbúatölur frá 1. desember fyrir árin 2019-2023.
Þessar tölur eru byggðar á skráningu Þjóðskrár á fjölda einstaklinga sem eru skráðir með búsetu hér á landi. Öllum er heimil afnot af fréttinni og meðfylgjandi gögnum en vinsamlegast getið heimildar.